Ниво 1

Заедно со Вашата ќерка/ученичка/роднина/корисничка ставете ја влошката на гаќите (кои ги користите како модел за демонстрирање). На влошката капнете неколку капки од обоената црвена вода за да се претстави впивањето и улогата на влошката.

Наведете дека на некои девојки/жени им тече повеќе крв, додека на други девојки/жени помалку. Сепак се очекува да истече крв колку што 10 мали лажици можат да соберат вода. Заедно со Вашата ќерка/ученичка/роднина/корисничка во една чаша ставете 10 мали лажици обоена црвена вода (приближна боја на крвта) за да може Вашата ќерка/ученичка/роднина/корисничка да ја визуелизира количината на крв која треба да истече за време на менструацијата. На овој начин се намалува можноста Вашата ќерка/ученичка/роднина/корисничка да стекне погрешна информација дека за време на менструацијата тече постојано и многу крв.

Согласно можностите на Вашата ќерка/ученичка/роднина/корисничка нагласете дека менструацијата трае неколку дена, најмногу една недела. Бројот на денови на траење на менструацијата асоцирајте ја со активности кои неа и се познати и траат колку што трае нејзината менструација (од понеделник до петок, колку што одиме на одмор, колку што денови одиш во училиште, дневен центар и сл.). Важно е да нагласите дека откако ќе поминат тие неколку дена, крвта престанува, за да не добие погрешен впечаток дека постојано излегува крв од вагината. Во текот на менструацијата користете календар за обележување на менструалните денови. Заедно со Вашата ќерка/ученичка/роднина/корисничка одберете симбол со кој ќе ги означувате тие денови (слика од влошка, смајли и сл.). На овој начин Вашата ќерка/ученичка/роднина/корисничка ќе може да ги визуелизира деновите кои преостануваат до крајот на менструацијата, односно да знае уште колку денови треба да носи влошка.

Доколку постојат и други личности со кои Вашата ќерка/ученичка/роднина/корисничка може да зборува за ставање на влошка и може да побара помош од нив (член на семејство, роднина, блиско опкружување) наведете ги и нив. Важно е сепак да се ограничи кругот со кои луѓе може да зборува на конкретната тема и од кои може да побара помош при ставање на влошка. Охрабрете ја Вашата ќерка/ученичка/роднина/корисничка на почетокот на првите менструални периоди да носи потемна облека, на која нема да биде видлива дамка од крв, доколку се случи изместување на влошката или протекување на крв на облеката. На овој начин се намалува можноста од непријатни ситуации во јавноста (училиште, надвор од домот и др.).

Појдете заедно со Вашата ќерка/ученичка/роднина/корисничка во блиската продавница или аптека и купете влошки. Согласно можностите на Вашата ќерка/ученичка/роднина/корисничка објаснете во кој дел од продавницата или аптеката се наоѓаат влошките (кај средствата за хигиена, шампони, сапуни и сл.). Исто посочете дека влошките може да бидат различни според големина и може да бидат спакувани во различни пакетчиња. Споредете големи влошки (ноќни) со просечни/мали (секојдневни) влошки. Согласно моменталните потреби на Вашата ќерка/ученичка/роднина/корисничка одберете соодветен вид на влошки.

Нагласете дека миењето на рацете, односно одржувањето на лична хигиена при секое ставање на влошка е многу важно. Посочете дека миењето на рацете е потребно поради допирањето на гаќите, при ставање на влошката.

Нагласете дека е многу важно опаковката и хартијата од влошката да се фрла само во корпата за отпадоци. Согласно можностите на Вашата ќерка/ученичка/роднина/корисничка посочете дека во спротивно, доколку истите ги фрли во шољата, таа ќе се затне. Доколку во WC нема корпа за отпадоци, тогаш посочете ја просторијата во која има корпа за отпадоци, во која може да ги фрли опаковката и хартијата (кујна, надвор пред влезна врата, двор и сл.). Користете модел за демонстрирање (хартија од влошка) за да го претставите движењето, односно фрлањето на хартијата и опаковката од влошката. Демонстрирањето можете да го изведете Вие или на Вашата ќерка/ученичка/роднина/корисничка да примените техника рака врз рака, каде со Вашите раце ги движите рацете на Вашата ќерка/ученичка/роднина/корисничка за таа да ја изведе активноста. На овој начин го поттикнувате моторното учење кај Вашата ќерка/ученичка/роднина/корисничка.

Доколку сте родител дозволете и на Вашата ќерка да се погледне во огледало, откако ќе ги облече гаќите со влошката. На тој начин ќе допие јасна претстава како изгледаат гаќите на нејзиното тело со ставена влошка.