Човечкото тело и развој

Нагласете дека женските делови во стомакот не може да ги види Вашата ќерка/ученичка/роднина/корисничка. Пред огледало заедно посочете го делот од стомакот во кој се наоѓаат женските делови (меѓу папокот и вагината).

Пред огледало или на слика од Вашата ќерка/ученичка/роднина/корисничка посочете ги набројаните промени. Доколку Вашата ќерка/ученичка/роднина/корисничка се уште не ги доживеала наведените промени посочете дека истите ќе се случат во иднина, односно дека Вашата ќерка/ученичка/роднина/корисничка треба да очекува нејзиното тело да изгледа слично како телото претставено на илустрацијата.

Нагласете дека женските репродуктивни органи ги прават јајце клетките и дека од јајце клетката може да се создаде бебе. Во однос на создавањето на бебето, секогаш наведете дека е потребно сперматозоидот, од машките репродуктивни органи, да влезе во јајце клетката. На тој начин ја исклучувате можноста Вашата ќерка/ученичка/роднина/корисничка да претпостави дека само од јајце клетката може да се создаде бебе.

Именувајте го течењето на крв од вагина како менструација. Земајќи предвид дека поимот е тежок за изговарање, не настојувајте премногу на точно изговарање од страна на Вашата ќерка/ученичка/роднина/корисничка. За целиот менструален циклус понатаму следува посебна приказна.

Нагласете дека секогаш кога јајце клетката нема да најде сперматозоид во јајцеводите од вагината ќе почне да тече крв. Со таа крв јајце клетката излегува надвор од телото на женското.

На самата илустрација со прст посочете ги деловите низ кои минува јајце клетката, доколку не најде сперматозоид во јајцеводите.

Согласно можностите и способностите на Вашата ќерка/ученичка/роднина/корисничка посочете дека бебето на почетокот е мало, но потоа расте се поголемо и поголемо.

Важно е да нагласите дека јајце клетката и сперматозоидот, треба да се закачат на некој од ѕидовите/страните на матката за да може од нив да почне да расте бебе.

На самата илустрација со прст посочете ги деловите, патот низ кој минува јајце клетката со сперматозоидот.

Согласно можностите и способностите на Вашата ќерка/ученичка/роднина/корисничка посочете дека сперматозоидите се многу мали и личат на црвчиња. Нагласете дека сперматозоидот доаѓа од машките репродуктивни органи. Да не се создаде мислење дека сперматозоидите се создаваат во женските репродуктивни органи.